କେସିଙ୍ଗା ସରକାରୀ ବାଳିକା ଉଚ୍ଚ ବିଦ୍ୟାଳୟରେ ହିନ୍ଦୀ ଦିବସ ପାଳିତ

କେସିଙ୍ଗା/ କେସିଙ୍ଗାସମାଚାର୧୮/୯(ମଧୁସୂଦନ ଠାକୁର) କେସିଙ୍ଗା ସ୍ଥିତ ସରକାରୀ ବାଳିକା ଉଚ୍ଚ ବିଦ୍ୟାଳୟ ପରିସରରେ ଆଜି ଉତ୍ସାହ ଓ ଉଦ୍ଦୀପନାର ସହିତ ହିନ୍ଦୀ ଦିବସ–୨୦୨୬ ପାଳିତ ହୋଇଯାଇଛି। ଏହି ଅବସରରେ ବିଦ୍ୟାଳୟରେ ହିନ୍ଦୀ ଭାଷାର ମହତ୍ତ୍ୱ, ଏହାର ସମୃଦ୍ଧ ସାହିତ୍ୟ ଓ ଜାତୀୟ ଏକତାରେ ହିନ୍ଦୀର ଭୂମିକା ସମ୍ପର୍କରେ ଆଲୋଚନା କରାଯାଇଥିଲା।ଉତ୍ସବରେ ବିଦ୍ୟାଳୟର ହିନ୍ଦୀ ଶିକ୍ଷକ କହ୍ନେଇଲାଲ ସାହୁ ମୁଖ୍ୟ ଅତିଥି ଭାବେ ଯୋଗଦେଇ ହିନ୍ଦୀ ଦିବସର ଗୁରୁତ୍ୱ ଓ ହିନ୍ଦୀ ଭାଷାର ବ୍ୟାପକତା ସମ୍ପର୍କରେ ନିଜର ମତବ୍ୟକ୍ତ କରିଥିଲେ। ସେ ଛାତ୍ରୀମାନଙ୍କୁ ହିନ୍ଦୀ ଭାଷା ଶିକ୍ଷା କରିବା ସହିତ ଏହାର ସାହିତ୍ୟିକ ଓ ସାଂସ୍କୃତିକ ଦିଗକୁ ଜାଣିବା ପାଇଁ ପ୍ରେରଣା ଦେଇଥିଲେ। ବିଦ୍ୟାଳୟର ଭାରପ୍ରାପ୍ତ ପ୍ରଧାନଶିକ୍ଷକ ଆର୍ତ୍ତତ୍ରାଣ ଷଡ଼ଙ୍ଗୀ କାର୍ଯ୍ୟକ୍ରମରେ ଅଧ୍ୟକ୍ଷତା କରି ହିନ୍ଦୀ ଭାଷାର ଗୁରୁତ୍ୱ ଓ ଛାତ୍ରୀମାନଙ୍କ ଭାଷା ଦକ୍ଷତା ବିକାଶ ଉପରେ ଆଲୋକପାତ କରିଥିଲେ। ବିଦ୍ୟାଳୟର ଶିକ୍ଷକ ସୁଶାନ୍ତ କୁମାର ମେହେର ଓ ଜି.କ୍ରିଷ୍ଣା ରେଡ୍ଡୀ ଭାରତର ସାଂସ୍କୃତିକ ବିଭବ ଓ ବିଭିନ୍ନତାକୁ ନୂତନ ଆଭାରେ ପରିପ୍ରକାଶ କରିବା ନିମନ୍ତେ ହିନ୍ଦୀ ଭାଷାର ଗୁରୁତ୍ଵପୂର୍ଣ୍ଣ ଭୂମିକା ବିଷୟରେ ବକ୍ତବ୍ୟ ପ୍ରଦାନ କରିଥିଲେ। ଏହି ଅବସରରେ ଛାତ୍ରୀମାନଙ୍କ ଦ୍ୱାରା ହିନ୍ଦୀ କବିତା ପାଠ, ଭାଷଣ, କାର୍ଯ୍ୟକ୍ରମ ଓ ବିଭିନ୍ନ ହିନ୍ଦୀ ଭିତ୍ତିକ ପ୍ରତିଯୋଗିତା ଆୟୋଜିତ ହୋଇଥିଲା ଏବଂ ସଫଳ ପ୍ରତିଯୋଗୀମାନଙ୍କୁ ପୁରସ୍କୃତ କରାଯାଇଥିଲା। ଶିକ୍ଷା ବର୍ଷ ୨୦୨୩-୨୪ରେ ହିନ୍ଦୀ ବିଷୟରେ ସର୍ବୋଚ୍ଚ ଅଙ୍କ ହାସଲ କରିଥିବା ବିଦ୍ୟାଳୟର ପୂର୍ବତନ ଛାତ୍ରୀ ରାକ୍ଷୀ ଗହିରଙ୍କୁ ସମ୍ବର୍ଦ୍ଧନା କରାଯାଇଥିଲା। ଏହି କାର୍ଯ୍ୟକ୍ରମକୁ ବିଦ୍ୟାଳୟର ଦୁଇ ଜଣ ଛାତ୍ରୀ ଓମିନା ମହାନନ୍ଦ ଓ ସୋନାକ୍ଷୀ ଠାକୁର ପରିଚାଳନା ବେଳେ ସଂସ୍କୃତ ଶିକ୍ଷୟିତ୍ରୀ ମାନସୀ ନାୟକ ଧନ୍ୟବାଦ ଅର୍ପଣ କରିଥିଲେ।କାର୍ଯ୍ୟକ୍ରମ ଶେଷରେ ହିନ୍ଦୀ ଭାଷାର ପ୍ରଚାର, ପ୍ରସାର ଓ ଛାତ୍ରୀମାନଙ୍କ ମଧ୍ୟରେ ହିନ୍ଦୀ ପ୍ରତି ଆଗ୍ରହ ସୃଷ୍ଟି କରିବାର ସଙ୍କଳ୍ପ ନିଆଯାଇଥିଲା। ସମଗ୍ର କାର୍ଯ୍ୟକ୍ରମଟି ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରୀମାନଙ୍କ ସହଯୋଗରେ ସଫଳତାର ସହ ସମ୍ପନ୍ନ ହୋଇଥିଲା।