ଜାତୀୟ ରାଜପଥ ଉପରେ ବୁଲୁଛନ୍ତି ଛଡ଼ା ଗାଈ: (ବଡ଼ ଦୁର୍ଘଟଣାର ଅପେକ୍ଷାରେ ପ୍ରଶାସନ?)

କେସିଙ୍ଗା ସମାଚାର ୮/୮(ମଧୁସୂଦନ ଠାକୁର ) ବର୍ଷା ଦିନ ଆସିବାରୁ କେସିଙ୍ଗା ସହରର ମୁଖ୍ୟ ରାସ୍ତା, ବଜାର ଅଞ୍ଚଳ ଓ ଜାତୀୟ ରାଜପଥରେ ଛଡ଼ା ଗାଈ ଓ ଶଣ୍ଢଙ୍କ ଅବାଧ ବିଚରଣ ଆରମ୍ଭ ହୋଇ ଗୁରୁତର ସମସ୍ୟାର ରୂପ ନେଉଛି। ଦିନ ହେଉ କି ରାତି, ଗାଈମାନେ ରାସ୍ତା ମଝିରେ ବସି ରହୁଥିବା ରୁ ଯାତାୟାତ ବାଧାପ୍ରାପ୍ତ ହେଉଛି ଏବଂ ପ୍ରତିଦିନ ଛୋଟ ଛୋଟ ଘଟଣା ହେବା ସହ ବଡ଼ ଦୁର୍ଘଟଣାର ଆଶଙ୍କା ମଧ୍ୟ ସୃଷ୍ଟି ହେଉଛି। ସ୍ଥାନୀୟ ଅଞ୍ଚଳବାସୀ ଏହି ସମସ୍ୟାକୁ ନେଇ ବାରମ୍ବାର ଉଦ୍ବେଗ ପ୍ରକାଶ କରୁଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସ୍ଥାୟୀ ପଦକ୍ଷେପ ନିଆଯାଇନାହିଁ।କେସିଙ୍ଗା ଏନଏସି ପକ୍ଷରୁ ରାସ୍ତାରେ ବୁଲୁଥିବା ଛଡ଼ା ଗାଈଙ୍କୁ ନିୟନ୍ତ୍ରଣ କରିବା, ମାଲିକଙ୍କୁ ଚିହ୍ନଟ କରିବା ଓ ନିୟମ ଅନୁସାରେ କାର୍ଯ୍ୟାନୁଷ୍ଠାନ ନେବା ପାଇଁ ବ୍ୟବସ୍ଥା ଥିବା ସତ୍ତ୍ୱେ ତାହାର ପ୍ରଭାବଶାଳୀ କାର୍ଯ୍ୟକାରିତା ଦେଖିବାକୁ ମିଳୁନାହିଁ। ଫଳରେ ଗାଈମାନେ ନିର୍ବିଘ୍ନରେ ରାସ୍ତାରେ ବୁଲୁଛନ୍ତି ଓ ଜନସାଧାରଣଙ୍କ ଜୀବନକୁ ବିପଦମୁଖୀ କରୁଛନ୍ତି। ଏହି ସମସ୍ୟା ପାଇଁ କେବଳ ପ୍ରଶାସନକୁ ଦାୟୀ କରିଦେଲେ ହେବ ନାହିଁ। ଅନେକ ଗୋପାଳକ ନିଜ ଗାଈ ମାନଙ୍କୁ ଦିନସାରା ଖୋଲା ଛାଡ଼ି ଦେଉଥିବାରୁ ସେମାନେ ରାସ୍ତାରେ ବୁଲିବା ସହ ପଲିଥିନ ଓ ଅନ୍ୟାନ୍ୟ ବର୍ଜ୍ୟବସ୍ତୁ ଖାଇ ଅସୁସ୍ଥ ହେଉଛନ୍ତି। ଏହା କେବଳ ଯାତାୟାତ ସୁରକ୍ଷାର ପ୍ରଶ୍ନ ନୁହେଁ, ବରଂ ପଶୁ କଲ୍ୟାଣ ସହ ମଧ୍ୟ ଜଡିତ ଏକ ଗୁରୁତ୍ୱପୂର୍ଣ୍ଣ ବିଷୟ।ସ୍ଥାନୀୟ ଲୋକଙ୍କ ଅଭିଯୋଗ ଯେ, ଏହି ସମସ୍ୟା ଦୀର୍ଘଦିନ ଧରି ରହିଥିଲେ ମଧ୍ୟ ସମ୍ପୃକ୍ତ ବିଭାଗର କର୍ମଚାରୀଙ୍କ ପକ୍ଷରୁ ଆବଶ୍ୟକୀୟ ତତ୍ପରତା ପରିଲକ୍ଷିତ ହେଉନାହିଁ। ପ୍ରସାଶନିକ ଉଦାସୀନତା ଯୋଗୁଁ ନିୟମିତ ଅଭିଯାନ, ଜରିମାନା କିମ୍ବା ସଚେତନତା କାର୍ଯ୍ୟକ୍ରମର ଅଭାବରୁ ଏହି ସମସ୍ୟା ଦିନକୁ ଦିନ ବଢ଼ିଚାଲିଛି।ସହରବାସୀଙ୍କ ପ୍ରଶ୍ନ ଯେ, କୌଣସି ବଡ଼ ସଡ଼କ ଦୁର୍ଘଟଣା କିମ୍ବା ଜୀବନହାନି ଘଟିବା ପରେ ହିଁ ପ୍ରଶାସନ ସକ୍ରିୟ ହେବ କି? ଦୁର୍ଘଟଣା ପରେ ପଦକ୍ଷେପ ନେବାଠାରୁ ଆଗୁଆ ସତର୍କତା ଓ ନିୟମର କଠୋର ପାଳନ ଅଧିକ ଜରୁରୀ ବୋଲି ସେମାନେ ମତ ପ୍ରକାଶ କରିଛନ୍ତି।ସ୍ଥାନୀୟ ବୁଦ୍ଧିଜୀବୀ ମାନଙ୍କ ମତରେ, କେସିଙ୍ଗା ଏନଏସି ନିୟମିତ ଭାବେ ଛଡ଼ା ଗାଈ ଧରିବା ଅଭିଯାନ ଚଳାଇବା, ଗୋମାଲିକଙ୍କୁ ଚିହ୍ନଟ କରି ଆବଶ୍ୟକ ଜରିମାନା ଆଦାୟ କରିବା, ଗୋଶାଳାର ବ୍ୟବସ୍ଥାକୁ ସୁଦୃଢ଼ କରିବା ଏବଂ ସହରବାସୀ ଙ୍କ ମଧ୍ୟରେ ସଚେତନତା ବଢ଼ାଇବା ଆବଶ୍ୟକ ରହିଛି। ସେହିପରି ଗୋପାଳକମାନେ ମଧ୍ୟ ନିଜ ଦାୟିତ୍ୱ ପାଳନ କରି ପଶୁମାନଙ୍କୁ ଖୋଲା ରାସ୍ତାରେ ନ ଛାଡ଼ିବା ଉଚିତ।ଜନସାଧାରଣଙ୍କ ସୁରକ୍ଷା ଓ ପଶୁ କଲ୍ୟାଣ କୁ ଦୃଷ୍ଟିରେ ରଖି ଏହି ସମସ୍ୟାର ସ୍ଥାୟୀ ସମାଧାନ ପାଇଁ କେସିଙ୍ଗା ଏନଏସି ଓ ସମ୍ପୃକ୍ତ ବିଭାଗ ତୁରନ୍ତ ପଦକ୍ଷେପ ନେବେ ବୋଲି ସହରବାସୀ ଆଶା ପ୍ରକାଶ କରିଛନ୍ତି।